ఎన్టీఆర్‌.. పేరు కాదు ఓ బ్రాండ్‌

నేడు నందమూరి   జయంతి సందర్భంగా ప్రత్యేక వ్యాసం

తెలుగు వారి గొప్పదనాన్ని అంతర్జాతీయంగా రెప రెపలాడిరచిన తెలుగు వెలుగు .. ఎన్టీఆర్‌. తెలుగువాళ్లు గర్వంగా తల పైకెత్తుకుని ఆయన మాకే సొంతం అని గర్వంగా చెప్పుకునే పేరు అది. నటుడిగా తెలుగు ప్రేక్షకుడి గుండెల్లో.. నాయకుడిగా తెలుగు వారి హృదయాల్లో ఆయన వేసిన ముద్ర శాశ్వతం.  295 చిత్రాల్లో ఆయన పోషించని పాత్రంటూ లేదు. ప్రతి పాత్రకు తన నటనతో ప్రాణం పోసిన నట దిగ్గజం ఎన్టీఆర్‌. ఆయన నటనకు ప్రజల్లో ఉన్న ఆదరణను చూసి సాధారణ మనుషులే కాదు.. ఎందరికో మార్గదర్శకులుగా నిలిచిన కంచి కామకోటి పీఠాధిపతి జగద్గురు పరమాచార్య సైతం పరవశమయ్యారు. 1978లో ఎన్టీఆర్‌కు విశ్వవిఖ్యాత నట సార్వభౌమ అనే బిరుదుని ప్రదానం చేశారు జగద్గురు. నటుడే కాదు.. మాన్యుడు - సామాన్యుడు.. తెలుగోడు.. మనోడు నందమూరి తారక రామారావు  102వ జయంతి నేడు.   నటుడిగా, నిర్మాతగా, దర్శకుడిగా, రాజకీయవేత్తగా ఆయన జీవన ప్రయాణాన్ని ఓ సారి స్మరించుకుందాం. 

సాధారణ రైతు కుటుంబంలో పుట్టి అంతర్జాతీయంగా తెలుగువారికి ఓ పేరుని తీసుకొచ్చిన ప్రయాణమే ఎన్టీఆర్‌. మనదేశం సినిమాతో మొదలైన ఆయన నట ప్రస్థానం పల్లెటూరి పిల్ల విజయంతో తొలి అడుగు వేసింది. అక్కడి నుంచి ఆయన తిరుగులేని, ఎదురులేని ప్రస్థానం మొదలైంది. పౌరాణికం, జానపదం, చారిత్రకం, సాంఘికం ఇలా పాత్ర ఏదైనా అందులో ఒదిగిపోయి ప్రేక్షకుల హృదయాల్లో చెరగని ముద్ర వేయడం ఆయనకే సొంతం.

 కృషి, దీక్ష, క్రమశిక్షణ, పట్టుదలతో తెలుగువారి పేరుని, గొప్పతనాన్ని విశ్వ విఖ్యాతం చేసిన ఘనత ఆయనది. షూటింగ్‌కు టైమ్‌ అంటే టైమ్‌కి హాజరయ్యేవారు. ఆయన ఆలస్యంగా వచ్చారనే సందర్భమే లేదు. అంత క్రమశిక్షణ ఆయన సొంతం.

 పౌరాణిక పాత్రలు..

శ్రీరాముడైనా, శ్రీకృష్ణుడైనా ఇప్పటికీ తెలుగువారికి గుర్తుకొచ్చే రూపం ఎన్టీఆర్‌. లవకుశ, శ్రీరామాంజనేయ యుద్ధం వంటి చిత్రాల్లో శ్రీరామునిగా సమ్మోహితులను చేశారు. శ్రీరాముడంటే కేవలం రావణ సంహరం చేసిన దేవ దేవుడిగానే కాదు.. ఆ పాత్రలోని ఆవేదనను సైతం వెండితెరపై చక్కగా ఆవిష్కరించటం ఎన్టీఆర్‌కే చెల్లింది. ఇక ఎన్టీఆర్‌ పోషించిన శ్రీకృష్ణుడి పాత్ర గురించి ఎంత చెప్పినా తక్కువే. మురారి పాత్రలో నటించటం అంటే పరిపూర్ణ వ్యక్తిత్వాన్ని వెండితెరపై ఇనుమడిరప చేయాలి. తనదైన నటనా చాతుర్యంతో ఆ పాత్రకు ఓ విలక్షణతను సంపాదించి పెట్టారు ఎన్టీఆర్‌. ఆయన నటనకు శ్రీకృష్ణుడి రూపాన్ని తెలుగు ప్రేక్షకులు గుండెల్లో గుడిగా కట్టుకున్నారు. దాదాపు 43 చిత్రాల్లో రామారావు శ్రీకృష్ణుడిగా కనిపించి అలరించారు. ఇది మరే నటుడికి దక్కని అరుదైన అవకాశం. 

పాత్ర ఏదైనా సరే అందులో పరకాయ ప్రవేశం చేసి ఆ పాత్ర అందరికీ గుర్తుండిపోయేలా చేయటం ఎన్టీఆర్‌కి మాత్రమే సాధ్యమైంది. రాముడు, కృష్ణుడే కాదు.. పరమేశ్వరుడిగానూ రౌద్రాన్ని వెండితెరపై సాక్షాత్కరింప చేయటం ఆయనకే చెల్లింది. ఇక అభిమాన ధనుడు సుయోధనుడిగా తారక రాముడు నటించిన తీరు ఇప్పటికీ మనం గుర్తు పెట్టుకున్నామంటే ఆయన ఆ పాత్రను పోషించిన విధానం మరెవ్వరికీ సాధ్యం కాలేదు. అహం, ఆత్మాభిమానం, గాంభీర్యం, రాజసం ఇలా అన్నీ లక్షణాలను ఒకే పాత్రలో ఇనుమడిరప చేసి నటించడటమంటే ఆషామాషీ కాదు. ఇక రావణ బ్రహ్మగా ఆయన నటన అనితర సాధ్యమనేలా నటించారు. ఆ పాత్రకు ఓ వైపు భక్తిని, మరో వైపు గర్వాన్ని చూపెడుతూ దానికి నాయకత్వాన్ని ఆపాదించి పెట్టారు.

 

చారిత్రక, జానపద పాత్రలు

ఇక చారిత్రక పాత్రలను ఎన్టీఆర్‌ పోషించి తనదైన ట్రెండ్‌ క్రియేట్‌ చేశారు. శ్రీకృష్ణ దేవరాయలు, చంద్ర గుప్తుడు, బ్రహ్మ నాయుడు, అక్బర్‌, వీర బ్రహ్మేంద్రస్వామి, అశోకుడు, శ్రీనాథుడు ఆయన నటన అసామాన్యం. ఆ పాత్రలను ఆయన తప్ప మరొకరు అంత గొప్పగా చేయలేరేమో అనేలా నటించటం ఆయన ప్రత్యేకత.  పౌరాణిక, చారిత్రక పాత్రలను వన్నె తెచ్చినట్లే ఎన్టీఆర్‌ తన నటనతో జానపద చిత్రాల్లోనూ నటించి మెప్పించారు. పాతాళ భైరవి, గులేబకావళి కథ, అగ్గిపిడుగు, ఏకవీర, రాజ మకుటం ఇలా ఎన్నో జానపద చిత్రాల్లో రాకుమారుడిగా కనిపించి మనసుల్లో గాఢమైన ముద్ర వేశారు.

 సాంఘిక పాత్రలు..

ఇక సాంఘిక చిత్రాల్లో ఆయన పోషించిన నటన గురించి చెప్పాలంటే పెద్ద చరిత్రే అవుతుంది. ఓ పాత్ర గురించి గొప్పగా చెప్తే మరో పాత్రను తక్కువ చేసినట్లే అవుతుంది. రిక్షా తొక్కుకునే వ్యక్తి నుంచి జస్టిస్‌ పాత్ర వరకు మన నిత్య జీవితంలో చూసే పాత్రల్లో ఎన్టీఆర్‌ నటించి ఎన్టీఆర్‌ తన విలక్షణతను చాటుకున్నారు. యమగోల, కొండవీటి సింహం, వేటగాడు, అడవి రాముడు, డ్రైవర్‌ రాముడు, జస్టిస్‌ చౌదరి ఇలా ఎన్నో పాత్రల్లో ఆయన నటన అసామాన్యం.

నిర్మాతగా.. దర్శకుడిగా తనదైన ముద్ర..

నటుడిగా విభిన్న పాత్రలను పోషించి అలరించిన ఎన్టీఆర్‌ నిర్మాతగానూ, దర్శకుడిగానూ సినిమాలను రూపొందించి అభిరుచిని చాటుకున్నారు. నేషనల్‌ ఆర్ట్‌ బ్యానర్‌ పేరుతో చిత్ర నిర్మాణ రంగంలోకి ఎన్టీఆర్‌ అడుగు పెట్టారు. నటించి దర్శకత్వం వహించిన సీతారామ కళ్యాణం, దానవీర శూర కర్ణ, శ్రీరామ పట్టాభిషేకం, చాణక్య చంద్రగుప్త, బ్రహ్మర్షి విశ్వామిత్ర, సమ్రాట్‌ అశోక వంటి చిత్రాలు చూస్తే ఆయన శైలిని, ప్రేక్షక నాడిని పట్టుకున్న తీరుని మనం గమనించవచ్చు.

 కాగా, ప్రతిభను గుర్తించి వెన్నుతట్టి ప్రోత్సహించటంలో ఎన్టీఆర్‌ ఎప్పుడూ ముందుండేవారు. శోభన్‌బాబు, కాంతారావు, సత్యనారాయణ, చలపతిరావు వంటి ఎందరినో ఆయన ప్రోత్సహించారు. నటులనే కాదు, సి.నారాయణరెడ్డి, వేటూరి వంటి కవులను కూడా సినీ రంగం దిశగా అడుగులు వేసేలా ప్రోత్సహించింది కూడా ఎన్టీఆరే. నవరసాలను పలికించే అరుదైన నటుల్లో ఆయనే అగ్ర గణ్యుడు అనటంలో సందేహం లేదు.